சரண் இயக்கத்தில் ராதிகா, பிக் பாஸ் புகழ் ஆரவ் ஆகியோர் நடிப்பில் உருவாகி வரும் ‘மார்க்கெட் ராஜா எம்பிபிஎஸ்’ படத்தின் ஃபர்ஸ்ட் லுக் போஸ்டர் வெளியாகி வைரலாகி வருகிறது.
அமர்க்களம், அட்டகாசம், ஜெமினி, வசூல் ராஜா எம்பிபிஎஸ் ஆகிய படங்களை இயக்கிய இயக்குனர் சரண் இயக்கத்தில் உருவாகி வரும் புதிய படம் மார்க்கெட் ராஜா எம்பிபிஎஸ். இப்படத்தில் ராதிகா சரத்குமார், பிக் பாஸ் புகழ் ஆரவ், காவ்யா தபர், ரோஹினி உள்ளிட்ட பலர் நடித்து வருகின்றனர்.
அண்மையில், இப்படத்தின் ஃபர்ஸ்ட் லுக் போஸ்டர் வெளியானது. இதில், ராதிகா நாற்காலியில் அமர்ந்து கொண்டு சுருட்டு குடிப்பது போன்றும், அருகில் ஆரவ் நின்றுகொண்டிருப்பது போன்றும் புகைப்படம் இடம் பெற்றிருந்தது.
இப்படத்தில் ராதிகா டானாகவும், ஆரவ், ரயில்வே காண்டிராக்டராக நடித்துள்ளார் என்று கூறப்படுகிறது. முழுக்க முழுக்க கேங்ஸ்டர் கதையை மையப்படுத்திய இப்படம் சுவாரஸ்யம் நிறைந்ததாகவும், மற்ற படங்களைப் போன்று இல்லாமல் வித்தியாசமாகவும் இருக்கும் என்று இயக்குனர் சரண் தெரிவித்துள்ளார்.
80 சதவீத படப்பிடிப்பு முடிக்கப்பட்ட நிலையில், சென்னையில் அடுத்தகட்ட படப்பிடிப்பு தொடங்கயிருக்கிறது. வரும் ஆகஸ்ட் மாதம் இப்படம் திரைக்கு வரும் என்று எதிர்பார்க்கப்படுகிறது.
இதற்கு முன்னதாக நடிகை ராதிகா (ரமணி ஆச்சி),நடிப்பில் வெளியான சகுனி படத்தில் அடியாட்களை வைத்துக் கொண்டு வட்டிக்கு விடும் தொழில் செய்து பின்னர், சென்னை மேயராக வலம் வந்தார். அதே போன்று ஒரு கதைக்களத்தை மையப்படுத்தியே இப்படம் உள்ளது என்பது குறிப்பிடத்தக்கது.
