பரியேரும் பெருமாள், ஜுங்கா என்ற பல தமிழ் படங்களில் நகைச்சுவை கதாபாத்திரத்தில் நடித்தவர் யோகி பாபு. வெறும் நகைச்சுவை கதாபாத்திரமாக மட்டும் இல்லாமல், குணச்சித்திர கதாபாத்திரத்திலும் நடித்து வருகிறார். சமீபத்தில் இவரது நடிப்பில் வந்த கோலமாவு கோகிலா படத்தில் நயன்தாராவை காதலிக்கும் ஹீரோ அளவிற்கு உயரத்தை எட்டினார்.
தமிழ் சினிமாவில் நகைச்சுவை நடிகர்கள் கதாநாயகனாகும் வரிசையில் யோகிபாபுவும் இணைந்துள்ளார். “தர்மபிரபு” என்ற படத்தில் யோகி பாபு கதாநாயகனாக நடிக்கிறார். இந்த படத்தில் யோகிபாபு எமன் வேடத்தில் வருகிறார். எமலோகத்தில் எமன் பதவி முடிவடையும் நிலையில் புதிய எமனை தேர்வு செய்ய தேர்தல் நடக்கிறது.
அந்த பதவிக்கு வாரிசு அடிப்படையில் யோகி பாபுவும் சித்ரகுப்தனாக இருக்கும் கருணாகரனும் போட்டியிடுகிறார்கள். இதில் யார் எமன் பதவியை தட்டி செல்கிறார் என்பது கதை. இந்த படத்தை முத்துகுமரன் இயக்குகிறார். இவர் விமல் நடிக்கும் கன்னிராசி படத்தை இயக்கிவருகிறார். ஸ்ரீவாரி பிலிம்ஸ் பட நிறுவனம் சார்பில் பி.ரங்கநாதன் தயாரிக்கிறார்.
படம் பற்றி இயக்குனர் முத்துக்குமரன் கூறும்போது “ழந்தைகள் முதல் பெரியவர்கள்வரை சிரிக்க வைக்கும் படமாக தர்மபிரபு தயாராகிறது. சமீபத்தில் தனது உடல் மொழியாலும் வசன உச்சரிப்பாலும் குரல் வளத்தாலும் அனைவரையும் தன் ரசிகர்களாக இழுத்து வைத்துள்ள யோகிபாபு எமன் வேடத்தில் நடிக்க ஒப்புக்கொண்டது பெரிய பலம்.
பல கோடி ரூபாய் செலவில் எமலோகம் அரங்கு அமைத்து படப்பிடிப்பு நடக்கிறது. ஜஸ்டின் பிரபாகரன் இசையமைக்கிறார். மகேஷ் முத்துசாமி ஒளிப்பதிவு செய்கிறார். டிசம்பரில் படப்பிடிப்பு தொடங்குகிறது”
என்றார்.
இந்த நிலையில், இப்படத்தின் 2வது லுக் போஸ்டர் வெளியாகி வைரலாகி வருகிறது. இதில், யோகி பாபு எமதர்ம ராஜா வேடத்தில் கம்பீரமாக இருக்கும் புகைப்படம் இடம்பெற்றுள்ளது. இதற்கு முன்னதாக வெளியிடப்பட்ட ஃபர்ஸ்ட் லுக் போஸ்டரில் எமதர்மராஜா இருக்கையில் அமர்ந்திருப்பது போன்ற புகைப்படம் இடம் பெற்றுள்ளது.
