‘தி அடார் லவ்’ படத்தின் மூலம் மலையாள சினிமாவில் அறிமுகமானவர் நடிகை பிரியா வாரியர். இப்படத்தில் இடம் பெற்ற ஒரு பாடல் காட்சியில் தன் கண் சிமிட்டல் மூலமாக இணையத்தில் ஒரே நாளில் உலகம் முழுவதும் பிரபலமானார். நடிகை பிரியா வாரியர் தற்போது நடித்துள்ள “ஸ்ரீதேவி பங்களா” என்ற பாலிவுட் படத்தின் டிரெய்லர் வெளியாகியுள்ளது.
“ஸ்ரீதேவி பங்களா” படத்தில் நடிகை ஸ்ரீதேவியின் மரணம் தொடர்பான காட்சிகள் இடம் பெற்றிருப்பதற்கு எதிர்ப்பு தெரிவித்து, அவரது கணவர் போனி கபூர் நோட்டீஸ் அனுப்பியுள்ளார்.
கடந்தாண்டு பிப்ரவரி மாதம் துபாய் ஹோட்டல் ஒன்றில் மர்மமான முறையில் உயிரிழந்தார் நடிகை ஸ்ரீதேவி. குளியலறை நீர்த்தொட்டியில் மூழ்கி அவர் உயிரிழந்ததாக அவரது குடும்பத்தினர் அதிகாரப்பூர்வமாக அறிவித்தனர். தொடர்ந்து அவரது மரணம் குறித்து பல்வேறு சந்தேகங்கள் எழுந்தன.
இந்நிலையில், ஸ்ரீதேவி பங்களா என்ற பெயரில் பாலிவுட்டில் படம் தயாராகியுள்ளது. இது மறைந்த நடிகை ஸ்ரீதேவியின் வாழ்க்கை வரலாறு எனக் கூறப்படுகிறது. பிரசாந்த் மம்பல்லி இயக்கியுள்ள இப்படத்தில் ஸ்ரீதேவி கதாபாத்திரத்தில் நடித்துள்ளார் பிரியா வாரியார்.
இப்படத்தின் டீசரில், பிரியா வாரியார் மது அருந்துவது, புகை பிடிப்பது போன்ற காட்சிகள் இடம் பெற்றுள்ளன. இந்த வீடியோவானது, வித் லவ் ஸ்ரீதேவி என்ற காட்சியில் ஆரம்பித்து, குளியல் தொட்டியில் இரண்டு கால்கள் தெரிவது போன்று முடிவடைகிறது.
இது நடிகை ஸ்ரீதேவியின் மரணத்தைக் குறிப்பதைப் போல் அமைந்துள்ளதால் இப்படம் மீதான எதிர்பார்ப்பு ரசிகர்களிடையே அதிகரித்துள்ளது. ஸ்ரீதேவியின் மரணம் பற்றிய மர்ம முடிச்சுகள் இப்படத்தில் அவிழ்க்கப்படலாம் என பலரும் எதிர்பார்க்கின்றனர்.
இந்நிலையில், இப்படக் காட்சிக்கு எதிர்ப்பு தெரிவித்து ஸ்ரீதேவியின் கணவர் போனி கபூர், ஸ்ரீதேவி பங்களா படக் குழுவினர் மற்றும் பிரியா வாரியாருக்கும் இது தொடர்பாக நோட்டீஸ் அனுப்பப் பட்டுள்ளது.
இந்த சட்டரீதியான நடவடிக்கையை எதிர்கொள்ளத் தயாராக இருப்பதாக பட இயக்குனர் பிரசாந்த் மம்பல்லி கூறியுள்ளார். ஸ்ரீதேவி பங்களா படத்தில் ஸ்ரீதேவி ஒரு பொதுவான பெயர். என் படத்தின் நாயகி கதாபாத்திரம் ஒரு நடிகை. எனவே, இதனை நாங்கள் அதை எதிர்கொள்வோம் என இயக்குனர் தெரிவித்துள்ளார்.
