கற்றது தமிழ், தங்கமீன்கள், தரமணி படத்தை தொடர்ந்து, இயக்குனர் ராம் இயக்கத்தில் உருவாகியுள்ள படம் `பேரன்பு’. கேரளா சூப்பர் ஸ்டார் மம்முட்டி, அஞ்சலி, தங்கமீன்கள் சாதனா உள்பட பலர் நடிப்பில் உருவாகியுள்ள இந்த படம், பல நாடுகளில் நடைபெற்ற சர்வதேச திரைப்பட விழாக்களில் திரையிடப்பட்டு மிகுந்த வரவேற்பை பெற்றது.
பி.எல். தேனப்பன் தயாரிப்பில் யுவன் ஷங்கர் ராஜா இசையில் உருவாகியுள்ள இந்த படம், பிப்ரவரி 1ம் தேதி வெளியாகி ரசிகர்கள் மத்தியில் அமோக வரவேற்பை பெற்றுள்ளது. அதையடுத்து தெலுங்கில் மதி வி.ராகவ் இயக்கத்தில் மம்முட்டி நடித்த யாத்ரா படம் பிப்ரவரி 8ம் தேதி வெளியானது. இந்த இரண்டு படங்களுமே வெற்றிகரமாக ஓடிக்கொண்டிருக்கிறது.
இரண்டு படங்களையும் பார்த்த நடிகர் சூர்யா, மம்முட்டியின் நடிப்பை பற்றி தனது டுவிட்டர் பக்கத்தில், “பேரன்பு, யாத்ரா இரண்டு படங்களிலுமே மாறுபட்ட கதைகளில் நடித்துள்ளார் மம்முட்டி. உண்மையான, தூய்மையான சினிமாவை கொடுத்ததற்காக பாராட்டுக்களையும், நன்றிகளையும் தெரிவித்துக்கொள்கிறேன்” என்று கூறியுள்ளார்.
முன்னதாக நடிகர் மம்முட்டியின் மகனும், நடிகருமான துல்கர் சல்மான், பேரன்பு படத்தில், தனது தந்தையின் மிகச் சிறப்பான நடிப்பு குறித்து தனது டுவிட்டர் பதிவில், “என் தந்தை இதுபோன்ற படங்களில் ஒரு குழந்தையின் குதூகலத்தோடு நடிப்பவர். அதற்கு காரணம் அவருடைய இந்த கலையின் மீதான முடிவில்லாத ஆர்வமும் காதலும், சினிமாவை அவர் உயிராக நேசிப்பதும் தான்” என்று பாராட்டியுள்ளார்.
