போலி இ-பாஸ் தயாரித்து கொடுத்ததாக அரசு ஊழியர்கள் உள்பட 5 பேர் சென்னையில் கைது செய்யப்பட்டுள்ளனர்.
கொரோனா வைரஸை கட்டுப்படுத்த பிறப்பிக்கப்பட்ட ஊரடங்கு அடுத்தடுத்து நீட்டிக்கப்பட்டு வருகிறது. அதேசமயம், சில தளர்வுகளும் அளிக்கப்பட்டுள்ளது. குறிப்பாக, வெளி மாநிலத்தில் சிக்கியுள்ளவர்கள், புலம் பெயர்ந்த தொழிலாளார்கள் அவர்களது சொந்த ஊர்களுக்கு திரும்ப அனுமதி அளிக்கப்பட்டுள்ளது.
தமிழகத்தில் ஊரடங்கு காலத்தில் இறுதி சடங்கு, திருமணம், மருத்துவ சிகிச்சை உள்ளிட்ட அத்தியாவசிய தேவைகளுக்கு வெளி மாவட்டங்களுக்கு செல்ல சில வழிமுறைகளை பின்பற்றி மாவட்ட ஆட்சியர்கள் மூலம் அனுமதி வழங்க தமிழக அரசு உத்தரவு பிறப்பித்தது.
இதனால் வெளிமாவட்டங்களுக்கு செல்வோர் ஆன்லைன் மூலம் விண்ணப்பம் செய்து அவசர பாஸ் பெறலாம் என தெரிவிக்கப்பட்டது. அதன்படி, பொதுமக்கள் ஆன்லைன் விண்ணப்பம் செய்து பாஸ் பெற்று செல்கின்றனர்.
இந்நிலையில், சென்னையில் போலி இ-பாஸ் தயாரித்து வழங்கியதாக சென்னை மாநகராட்சி ஊழியர், மாவட்ட ஆட்சியர் அலுவலக ஊழியர்கள் என மூன்று அரசு ஊழியர்கள் உள்பட 5 பேர் கைது செய்யப்பட்டுள்ளனர்.
ரூ.3,000 முதல் ரூ.5,000 வரை பணம் பெற்றுக்கொண்டு போலி இ-பாஸ் தயாரித்து வழங்கியதாக எழுந்த புகாரின் அடிப்படையில் விசாரணை மேற்கொண்ட மத்திய குற்றப்பிரிவு போலீசார் இந்த கைது நடவடிக்கையை மேற்கொண்டுள்ளனர்.
மேலும் வாசிக்க: வீட்டிலிருந்தே கல்வி கற்க புதிய இணையதளம்- தமிழக பள்ளிக் கல்வித்துறை
