மஹா படத்தின் ஃபர்ஸ்ட் லுக் போஸ்டர் தொடர்பாக நடிகை ஹன்சிகா மற்றும் படத்தின் இயக்குநர் மீது நடவடிக்கை எடுக்கக்கோரி பாமக வழக்கு தொடர்ந்துள்ளது.
கடந்த 9ம் தேதி மஹா திரைப்படத்தின் ஃபர்ஸ்ட் லுக் போஸ்டர் சமூக வலைதளங்கள்ளில் வெளியானது. இந்த போஸ்டரில் நடிகை ஹன்சிகா, காசி கோயில் பின்புறம் ருத்ராட்ச மாலை அணிந்து காலில் செருப்பு மற்றும் வலது கையில் சுருட்டு வைத்துப் புகைப்பது போன்ற காட்சி அமைக்கப்பட்டுள்ளது.
இந்த காட்சி இந்து மதத்தினரின் மனம் புண்படுத்தும்படியும், பெண்கள் மற்றும் மாணவிகளை தவறான பாதைக்கு அழைத்து செல்லும் என்று கூறி நடிகை ஹன்சிகா மற்றும் பட இயக்குநர் ஜமீல் மீதும் பாமக.வின் சமூகநீதிப் பேரவை வழக்கறிஞர் ஜானகி ராமன் என்பவர் இராணிப்பேட்டை ஒருங்கிணைந்த நீதிமன்றத்தில் மனு தாக்கல் செய்துள்ளார்.
மனுவில், மஹா படத்தின் போஸ்டர் இந்து மத உணர்வுகளைக் கொச்சைப்படுத்துவதாக இருக்கிறது. எனவே, நடிகை ஹன்சிகா மற்றும் மஹா திரைப்பட இயக்குநர் ஜமீல் மீது நடவடிக்கை எடுக்க வேண்டும் என்று குறிப்பிடப்பட்டுள்ளது. ஹன்சிகா மீதான வழக்கு விசாரணை 14 ஆம் தேதி நீதிபதி தீனதயாளன் முன்னிலையில் விசாரணைக்கு வரும் எனக் கூறப்படுகிறது.
இதற்கு முன்னதாக சர்கார் படத்தின் ஃபர்ஸ்ட் லுக் போஸ்டரில் நடிகர் விஜய் புகைபிடிப்பது போன்ற காட்சிக்கு பாமக எதிர்ப்பு தெரிவித்திருந்ததும் குறிப்பிடத்தக்கது.
