சமீபத்தில் டிஜிபி அலுவலகம் முன்பு இரு காவலரகள் மண்ணெய் ஊற்றி தற்கொலைக்கு முயன்றது நினைவில் இருந்து மறையும் முன்னர் மற்றுமொரு தமிழக காவலர் தற்கொலை செய்து இருப்பது அதிர்வலைகளை ஏற்படுத்தியது.

கடந்த சில மாதங்களில் தமிழகத்தில் காவலர்கள் தற்கொலை மற்றும் தற்கொலை முயற்சிகளில் ஈடுபட்டு வருகின்றனர். இந்நிலையில் தற்போது மேலும் ஒரு காவலர் தூக்கிட்டு தற்கொலை செய்து கொண்டுள்ளார்.

காவலர்கள் தற்கொலை முயற்சியில் ஈடுபடுவதை தடுக்க காவல்துறை ஆணையர் யோகா பயிற்சியை துவங்கி வைத்தார்.

இருந்த போதிலும் அசோக் நகர் காவலர் பயிற்சி பள்ளியில் பயிலும் பாலமுருகன் என்பவர் தூக்கிட்டு தற்கொலை செய்து கொண்ட சம்பவம் பெரும் அதிர்ச்சியை ஏற்படுத்தியுள்ளது.

சென்னை ஈஞ்சம்பாக்கம், பொதிகை நகரைச் சேர்ந்தவர் விஜயரங்கன். சைக்கிளில் டீ விற்றுவருகிறார். இவரின் மனைவி காளியம்மாள். இவர்களது மகன் பாலமுருகன். கடந்த நான்கு ஆண்டுகளுக்கு முன், தமிழக காவல்துறையில் காவலராகப் பணியில் சேர்ந்தார். தற்போது, சென்னை அசோக்நகரில் உள்ள காவலர் பயிற்சிப் பள்ளியில் பாலமுருகனுக்கு பணி ஒதுக்கப்பட்டிருந்தது.

இந்த நிலையில், கடந்த சில தினங்களாக பாலமுருகனுக்கு உடல் நலம் சரியில்லை. இதனால், அவர் விடுமுறையில் இருந்துள்ளார். நேற்று அவர் பணிக்குச் சென்றுவிட்டு, பிறகு வீட்டில் தூங்கினார். பாலமுருகனின் வீட்டின் கழிவறையின் கதவு நீண்ட நேரமாக திறக்கப்படாததால், வீட்டில் உள்ளவர்கள் சந்தேகம் அடைந்தனர். பிறகு, கதவை உடைத்துக்கொண்டு உள்ளே சென்றுப்பார்த்தபோதுதான் பாலமுருகன் தூக்குப்போட்டு தற்கொலை செய்துகொண்டது தெரிந்தது.

இதையடுத்து, நீலாங்கரை போலீஸாருக்குத் தகவல் தெரிவிக்கப்பட்டது. போலீஸார், பாலமுருகனின் சடலத்தை மீட்டு, ராயப்பேட்டை அரசு மருத்துவமனைக்கு அனுப்பிவைத்தனர். தொடர்ந்து போலீஸார் விசாரணை நடத்திவருகின்றனர்.

இதுகுறித்து விஜயரங்கன் கூறுகையில், "கடந்த மூன்று மாதங்களுக்கு முன்பு இந்த வேலை பிடிக்கவில்லை என்று பாலமுருகன் என்னிடம் தெரிவித்தார். அப்போது, 'உன் விருப்பம் எதுவுவோ அதைச் செய்' என்று கூறினேன். கடந்த சில தினங்களாக உடல் நலம் சரியில்லை என்று விடுமுறையில் இருந்தார். அப்போதுதான், அவருக்கு ஒரு போன் அழைப்பு வந்தது. அதில், 'நான் வந்துவிடுகிறேன் மேடம்' என்று பேசிக்கொண்டிருந்தார். பிறகு வேலைக்குச் சென்றார்.

அதிகாலையில் டீ விற்கச் செல்லும்போதுகூட அவர் தூங்கிக் கொண்டிருந்தார். அதன்பிறகுதான் இந்த முடிவை எடுத்துள்ளார். அவருடன் பிறந்த இரண்டு சகோதரிகளில் ஒருவருக்கு திருமணம் முடிந்துவிட்டது. அடுத்து, பாலமுருகனுக்கு திருமணம் செய்ய ஏற்பாடு நடந்தது. 'ஐந்து பெண்களைப் பார்த்துள்ளோம். விரைவில் மணக்கோலத்தில் அவரைப் பார்ப்போம்' என்று நினைத்த எங்களுக்கு, அவரின் இழப்பு கடும் அதிர்ச்சி அளிக்கிறது" என்றார் கண்ணீர்மல்க.

இந்த தற்கொலை குறித்து போலீசார் விசாரணை மேற்கொண்டு வருகின்றனர்.